धानेप: मौजे धानेप येथे एक अत्यंत दुर्दैवी घटना घडली आहे, ज्यामध्ये शंकर आनंद मरळ याने रात्रौच्या सुमारास ज्येष्ठ महिला राधाबाई कोंडीबा डोईफोडे यांच्यावर दारूच्या नशेत हल्ला केला. या हल्ल्यात राधाबाई गंभीर जखमी झाल्या असून, त्यांना चेहऱ्यावर काठीचे मार लागले आहेत आणि तोंडावर टाके घालावे लागले आहेत. यापूर्वीही आरोपी शंकर मरळने राधाबाईंना मारहाण केली होती.
याच पार्श्वभूमीवर, छात्रभारती विद्यार्थी संघटना आणि शिक्षक भारती यांनी पोलिस प्रशासनाकडे या प्रकरणी लवकरात लवकर योग्य कारवाई करण्याची मागणी केली आहे. त्यांचे म्हणणे आहे की आरोपीवर 324 कलमाऐवजी 307 कलम लागू करणे आवश्यक आहे, कारण हल्ल्याचे स्वरूप गंभीर आहे आणि आरोपीचे कृत्य जिवघेण्याच्या प्रयत्नाचे आहे.
यावेळी छात्रभारती राज्य उपाध्यक्ष, तुकाराम डोईफोडे शिक्षक भारती चे तालुकाध्यक्ष धोंडीबा जानकर यांच्यासह प्रमुख संघटनांनी या निवेदनाला पाठिंबा दिला.
पुढे, छात्रभारती आणि शिक्षक भारती यांच्या वतीने एकत्र येऊन आंदोलन करण्याचा इशारा देण्यात आला आहे. या आंदोलनात सर्व प्रमुख संघटना आणि बहुसंख्येने सहभागी होणार असल्याची माहिती देण्यात आली.
हे प्रकरण त्वरित तपासून आरोपीवर कडक कारवाई केली जावी अशी मागणी संघटनांनी केली आहे.
